Pangunahing kabuhayan ng mga residente ng Bustos, Bulacan ang pag-aalaga ng hito o catfish.

Dalawang dekada na itong kabuhayan ni Vice Mayor Martin Angeles.

"1993 nagstart na akong mag-hito farming pero ang aming inalagaan ay 5,000 pieces lamang, ganu'ng kaunti lang at meron akong kasosyo na pinag-aaralan namin kung papaano talaga mag-hito kasi nu'n pa lang naman dumating sa Pilipinas ‘yan eh," kuwento ni Angeles sa KBYN.

• KBYN: Hito Festival tampok sa Bustos, Bulacan

Kilala ang hito bilang 'isdang may balbas'.

Dahil sa kanilang hasang at lung-like organs, kaya nilang kumuha ng hangin sa tubig at dahil ito ay matibay, maaari kang mag-alaga nito kahit pa sa likod ng inyong tahanan.

May tatlong uri ng hito na matatagpuan sa Pilipinas – ang Native catfish o Clarias macrocephalus, ang Taiwan catfish o Clarias batrachus at ang African catfish o Clarias gariepinus.

Sa mga nabanggit na species, ang African at Native catfish ang tinatangkilik sa merkado.

Sa isang ektarya, umaabot ng isang milyong piso ang nagagastos ni Vice Mayor Angeles sa pag-aalaga ng mga hito pero oras na ito ay kanilang mapalaki ng 150 hanggang 500 grams ay maaari na nila itong ibenta sa magandang halaga.

"4-5 months harvest na siya. Ganu'n lang siya kabilis kaya du'n sa mga nagne-negosyo na ang gusto ay mabilisan, ito 4-5 months alam mo na kung nalugi ka o kumita," ani Angeles.

Mula sa isang maliit na fishpond ni Angeles noong dekada '90, mayroon na siya ngayong 80 fishpond sa kaniyang 33 ektarya na alagaan ng hito.

Patuloy na tumataas ang market demand sa hito.

Katunayan mas mataas pa sa tilapia ang farm gate price nito kaya naman maraming mga kababayan natin sa Bulacan ang na-e-engganyo na mag-alaga nito.

"Ang lahat naman ng bagay sa paniniwala po ng inyong lingkod ay magiging matagumpay kapag ito ay napag-aralan," payo ni Angeles sa mga nais pasukin ang ganitong klase ng negosyo.

RELATED LINKS:

• KBYN: Grupo tumutulong ibenta ang tanim ng mga magsasaka para di masayang
• KBYN: Mga magsasaka sa Benguet, nahihirapang ibenta ang kanilang mga pananim
• KBYN: Sipag at pagpupursigi ng pinya vendor na may polio
• KBYN: Alamin ang manok na mayabang, manok na tumatawa, atbp.