MAYNILA — Nag-iwan ng makapal na putik ang bahang dulot ng Bagyong Paeng sa ilang barangay sa Noveleta, Cavite.

Hanggang ngayon, wala pang mga sasakyang nakapapasok sa ilang parte ng Barangay San Jose 1 dahil sa hinahakot na putik ng mga residente.

Humupa na nitong Linggo ang baha sa 10 barangay kaya nagsimula na ring maglinis ang mga residente ng kanilang mga bahay.

Sa Barangay San Jose 1, umabot ng higit 4 na talampakan ang taas ng baha.

Walang nasalbang mga gamit ang mga residente.

Pati ang sari-sari store na tanging hanapbuhay ni Susan Esguerra, nasira lang ng baha ang mga paninda na higit P20,000 ang halaga.

“Siyempre naiiyak, ito ang income namin. May pinag-aaral pa ako,” ayon kay Esguerra.

Nasira rin ang pader ng bahay nila Perry June Anselmo dahil bukod sa ragasa ng baha, nabangga pa ng inanod na van ang kanilang tahanan.

“Lakas na ng tubig, ng impact. Inanod 'yong 2 van, dito bumalandra sa bahay ko. ‘Yong bulusok ng tubig doon na tumama sa amin,” ayon kay Anselmo.

Ayon sa Noveleta Municipal Disaster Risk Reduction and Management Office, bumigay ang river wall sa Ylang-Ylang River kaya rumagasa ang tubig sa mga barangay.

Sinabi ni MDRRMO chief Jigs Alix na nasa critical level noon ang lebel ng tubig sa ilog at hindi pa sana kailangan ng forced evacuation.

Ayon sa residenteng si Louie Mark Peñalba, mabilis na tumaas ang tubig sa loob lang ng 15 minuto.

“Pagdating ng bandang 6 p.m., unti-unting tumataas, 15 minutes lang umabot na ng dibdib. Sobrang bilis ng pangyayari. Walang nakapag-prepare. Ang ginawang evacuation, kung sino na lang may taas. Naisip ko na lang, iligtas mo ang sarili mo. Gamit mo hayaan mo na,” ayon kay Peñalba.

• Noveleta residents climb rooftops to escape 'Paeng' floods

Watch more News on iWantTFC

Dalawa naman ang naiulat na patay sa Noveleta dahil sa Bagyong Paeng.

• 2 patay sa Noveleta, Cavite dahil sa bagyong Paeng

Wala pa ring suplay ng kuryente sa ngayon sa ilang barangay sa bayan.

May suplay na ng tubig pero humihingi ngayon ang mga residente ng malinis na tubig na maiinom at pagkain.

Ilang mga mangangalakal naman ang nanghuhuli ng isdang tilapia na inanod mula sa ilog para ipang-ulam ng pamilya.

• Rumaragasang tubig-baha dulot ni Paeng sa ilang parte ng Noveleta, Cavite

Watch more News on iWantTFC