Ilang mga barangay sa bayan ng Kawit, Cavite ang nalubog sa baha dahil sa pananalasa ng Bagyong Paeng, Sabado ng gabi.

Sa Brgy. Putol Magdalo ilang mga residente ang sinuong ang mataas na baha na abot-baywang.

Bumisita naman si Kawit Mayor Angelo Emilio Aguinaldo sa Binakayan National High School kung saan naroon ang ilang mga lumikas na pamilya dahil sa baha.

Patuloy ang rescue operation ng Cavite Provincial Disaster Risk Reduction Management Office (PDRRMO) kasama ang ilang local DRRMO para sa mga na-trap na mga residente sa iba pang mga lugar sa lalawigan ng Cavite.

Isa na sa naging prayoridad ng Cavite PDRRMO ay ang Brgy. San Juan 1 sa Noveleta.

• 'Na-trap na po kami': Mga residente sa Laguna, Cavite humingi ng rescue

"Marami pong pamilya ang na-trap sa San Juan (Noveleta), so humingi na rin talaga ng tulong ang LGU ng Noveleta sa provincial government," ani Mark Bawalan, Division Head ng Cavite PDRRMO.

• Nearly 100 people trapped in CEZ as severe flooding hits Rosario, Cavite

Madaling-araw Linggo nang humina na ang Paeng, ngunit hindi pa kaagad humupa ang baha sa Kawit, kung saan nawalan rin ng kuryente.

Sa Brgy. Kanluran, lagpas-tuhod pa rin ang baha pasado ala-1 ng madaling araw.

Sinisikap pa ng ABS-CBN News na makakuha ng kumpletong detalye tungkol sa sitwasyon ngayon sa Kawit at mga karatig-bayan.