MAYNILA - Timbog ang apat na umano'y kidnapper sa Pasay, Biyernes ng gabi, na kinabibilangan ng tatlong Chinese at isang Pilipino.

Ayon sa Southern Police District, nagkasa ng operasyon ang intel operatives ng Pasay City police matapos makakuha ng impormasyon na may kinidnap umano ang grupo.

Base sa ulat, dinukot ng grupo ang isang 21 anyos na Chinese sa may CCP complex noong Oktubre 2.

Dinala umano ang biktima sa isang POGO company sa Williams Street sa Pasay. Humingi ng P300,000 na ransom ang mga suspek sa biktima kapalit ng kaniyang buhay.

Natawagan ng biktima ang kaniyang kaibigan na nangakong magdadala ng pera. Pero nagsumbong na pala ang kaibigan sa mga pulis at nagkasa na sila ng entrapment operasyon.

Nakipagkita ang kaibigan ng biktima sa mga suspek sa harap ng isang hotel sa Parañaque, kasama na rin ang mga pulis.

Nahuli ang apat, at nailigtas naman ang biktima.

Sa ngayon, ang apat na suspek ay nakakulong na sa Pasay City Detention Management Unit.

May mga kaparehong kaso na rin sa iba't ibang bahagi ng Kamaynilaan na kinasasangkutan ng mga Chinese na kadalasan ay may kinalaman umano sa POGO business.

• 3 arestado sa umano’y kidnap-for-ransom sa mga Chinese sa Pasay City
• Chinese national tiklo sa pandurukot ng kapwa Chinese sa Maynila
• 9 katao sangkot sa pag-kidnap ng Chinese national, arestado

Watch more in iWantv or TFC.tv