BANTAY, Ilocos Sur -- Hindi inalintana ni Lheslie De Lima ng Camarines Sur ang init sa Quirino Stadium nang nakapaang itakbo ang unang gintong medalyang nakataya sa 2018 Palarong Pambansa Lunes.

Nagreyna ang 13-anyos na si De Lima sa 3,000-meter run ng secondary girls matapos talunin ang atleta mula Northern Mindanao na si Camila Tubiano.

Ayon sa incoming Grade 8 ng Baao National High School, pinanatili lamang niya ang bilis ng takbo sa huling 200 metro ng laban nang magsimulang dumikit sa kanya si Tubiano na tumakbo ring nakapaa.

• Palarong Pambansa: Archer, kinabahan sa pagsindi sa cauldron dahil sa Pangulo
• IN PHOTOS: Colors, icons welcome Palarong Pambansa delegates in Ilocos

Bagamat nagagawang mag-ensayo nang nakasapatos, mas pinili ni De Lima na tumakbo nakapaa.

Ito ang kauna-unahang gintong medalya ni De Lima sa Palarong Pambansa matapos ang 3 pilak na medalyang nakuha noong siya ay nasa elementarya pa.

Anak ng isang magsasaka sa Baao, Camarines Sur si De Lima at ikalima sa 7 magkakapatid.

• KILALANIN: Nag-iisang atletang taga-Marawi sa Palaro, 3 araw lang nakapaghanda
• 'Tinawag namin lahat ng santo': Ina ng kampeon sa shot put, nangutang ng pamasahe para sa Palaro

Nagsimula siyang sumali sa track and field noong siya ay Grade 5 at ngayo'y nakalahok na sa ikatlong sunod na Palarong Pambansa.

Inamin din niya na inasahan niyang maiuwi ang gintong medalya lalo pa't naging mahaba rin ang naging preparasyon niya bago ang Palaro.

May natitira pang 2 kompetisyon ang nangangarap na maging guro na atleta, ang 800-meter at kanyang paboritong 1,500-meter run.

• Palarong Pambansa: NCR, Cagayan Valley tracksters shine

Dismayado naman sa naging resulta ang Northern Mindanao dahil sa anilang hindi maayos na pagpapatakbo sa laban.

Hindi naging malinaw para sa mga mananakbo kung ilang ikot pa ang kailangan nilang takbuhin sa oval kaya naman sumobra ng isang round ang kanilang takbo.