Watch more in iWantv or TFC.tv

CAMALIG, Albay — Lubog pa rin sa baha at lahar ang ilang bahay sa Albay matapos ang hambalos ng bagyong Rolly noong Linggo.

• Bayan Mo i-Patrol Mo: Hagupit ni Bagyong Quinta sa iba’t ibang bahagi ng Pilipinas

Walang malaki o maliit na bahay na pinili ang bagsik ng pinakamalakas na bagyo sa mundo ngayong taon.

• Philippines braces for world's strongest typhoon in 2020

Sa Sitio Sogong, halos lahat ng bahay ay nalubog sa baha at lahar.

Si Evelyn Nieva, hanggang tanaw na lang muna sa bahay niya na lubog sa baha 4 na araw matapos ang hagupit ng bagyo.

"Nakakaiyak, wala ka nang bahay," ani Nieva.

Hindi rin makapasok sa lubog na bahay niya si Lea Nocete.

"Walang matulugan, wala ang mga damit, naubos mga gamit," ani Nocete.

Ngayong Huwebes, may ilang residente nang nagpumilit umuwi ng bahay para maglinis matapos bumaba ang lebel ng tubig-baha.

Pero nanlumo si Judy Trisinio sa dinatnan dahil kinalawang na ang makinang pantahi na pinagkukuhanan niya ng kabuhayan.

"Sira na po 'yan kasi naano na po ng kalawang na maputik," hinaing niya.

Nasa gilid ng dike ang mga bahay sa Sitio Sogong kaya madaling pinasok ang mga bahay nila ng baha.

Samantala, tuloy tuloy na ang clearing operations para maalis ang tambak na mga lahar. Pero panawagan nila ay mga equipment para mapadali ito.

• Bakit quarrying ang sinisisi ng mga residente sa lahar flow noong 'Rolly'

Bukod sa heavy equipment, nagbabayanihan na rin ang mga residente sa paggawa ng madadaanan ng tubig papunta sa dike para humupa na ang tubig sa mga lubog pang bahay.

Watch more in iWantv or TFC.tv

— Mula sa ulat ni Jose Carretero