Maagang nagtungo nitong Sabado sa Comelec Office sa Tanauan City si Mark Anthony Halili para maghain ng kanyang certificate of candidacy sa pagtakbong alkalde ng lungsod.

Napili nitong partido ang Pederalismo ng Dugong Dakilang Samahan.

Si Halili ang panganay na anak ni dating mayor Antonio Halili, na binaril at pinatay sa harapan ng Tanauan city hall habang nagfa-flag ceremony noong July 2, 2018.

“Nu’n pa naman kasi si daddy ang gusto niya ako na ang susunod. At that time we decided lang na hindi na muna. Unang-una family and masyadong abrupt at that time. Saka ’yung negosyo hands on kasi ako sa negosyo, hindi pwedeng basta iwanan,” ayon kay Mark.

Sakaling manalo, prayoridad niyang magawa ang lahat ng naipangakong proyekto ng ama at ipagpatuloy ang inumpisahang programa ng nakababatang kapatid, si incumbent Mayor Angeline “Sweet” Halili.

• Long-time Duterte aide Bong Go files COC for vice president

“Si daddy ang gusto free hospital. Ginawa naman na ni Sweet, inumpisahan na niya, nakabili na ng lupa ba-budgetan na lang pampagawa. Of course, there’s a long process. May study pa ’yan. Kailangan kino-consult din lagi ang DOH eventually mapapa-bid na ’yan. Siguro ’pag ako sinuwerte ako na ang magi-implement na nu’n,” aniya.

Tutukan din ni Halili na malagyan ng bypass roads ang bawat adjacent barangays sa lungsod, paghikayat sa mga investors, farm to market road, at mas maayos na serbisyo para sa mga residente ng Tanauan.

Esteban Contreras ng Capiz tatakbo muli bilang governor

Samantala sa Capiz, naghain si incumbent Governor Esteban Contreras ng kaniyang COC para tumakbo sa kanyang ika-2 termino.

• Sara Duterte-Carpio files COC for Davao City mayor

Kasamang naghain ni Contreras ng kanilang certificate of candidacy sina Mambusao Mayor Leodegario Labao Jr., na tatakbong congressman sa ika-2 distrito ng Capiz, at dating Capiz governor Jose Borda na tatakbo naman bilang congressman ng unang distrito ng lalawigan.

Ang tatlo ay tatakbo sa ilalim ng partidong PDP-Laban.

Michelle Rabat muling tatakbo bilang Mati mayor

Sa Mati City, Davao Oriental, naghain na ng COC si Mayor Michelle Rabat para sa ika-2 termino bilang alkalde ng lungsod.

Kasama niya ang kaniyang nakababatang kapatid na si councilor Eric Rabat, na naghain din ng COC para sa pagka-bise mayor.

Sa lalawigan ng Davao Oriental, naghain ng kanyang COC si Davao Oriental first district Rep. Corazon Malanyaon na naglalayong makabalik bilang gobernador ng lalawigan, habang nakatakdang kumandidato si Governor Nelson Dayanghirang bilang kongresista sa unang distrito ng Davao Oriental.

Sa Davao City, naghain ng kanyang certificate of candidacy Sabado si first district councilor J Melchor Quitain Jr. para sa ika-3 termino nito.

Sa Davao del Norte, muli namang magpapahalal si Gov. Edwin Jubahib na naghain na ng kanyang COC sa Comelec office ng lalawigan.

• Duterte announces ‘retirement from politics’

Sa Masbate, naghain ng COC sina incumbent Masbate 1st District Representative Narciso "Bong" Bravo at ang asawang si Marvi Bravo.

Si Bong ang tatakbo bilang gobernador at balak pumalit naman sa kanyang posisyon bilang kongresista ng distrito ang asawang si Marvi na una na ring sumabak bilang bise gobernador noong 2019, pero natalo ni incumbent Masbate Vice Governor Ara Kho na anak ni Masbate Governor Antonio Kho. — May ulat nina Andrew Bernardo, Yuan-Enzo Escaniel, Hernel Tocmo at Karren Canon