MAYNILA -- Higit 100 locally-stranded individuals na noo'y sumilong sa expressway ng Ninoy Aquino International Airport (NAIA) ang pauwi na sa kani-kanilang mga probinsiya, sabi ngayong Lunes ng Philippine Coast Guard (PCG).

Karamihan umano sa nasa 150 locally-stranded individuals ay patungong Davao City at General Santos City.

Sinundo ng mga bus ng PCG ang mga na-stranded mula Villamor Air Base sa Pasay at ibiniyahe hanggang Port Area ng Maynila, kung saan sila isinakay sa BRP Gabriela Silang.

Tiniyak ni Coast Guard Commandant Vice Admiral George Usabia Jr. na ipagkakaloob sa mga na-stranded ang lahat ng kanilang pangangailangan sa loob ng 2 araw na biyahe pauwi. Kabilang umano rito ang pagkain at kumportableng lodging sa barko.

Ayon kay Ursabia, mayroon ding medical personnel na sakay ang barko para matiyak na mapapanatiling ligtas at COVID-19-free ang mga pauwi ng probinsiya.

Wala rin umanong gagastusin ang mga na-stranded sa kanilang pag-uwi sa mga probinsiya dahil sagot ng gobyerno ang pasahe at pagkain.

• Daan-daang sumilong sa NAIA Expressway dinala na sa ibang pasilidad
• Daan-daang stranded sa NAIA Expressway inabutan ng tulong

-- Ulat ni Johnson Manabat, ABS-CBN News