MANILA - Ibinahagi ni Bayan Patroller Hernan Lee Hachuela sa social media ang kanyang mga kuhang larawan ng sitwasyon sa Brgy. Poblacion Ilaya, sa bayan ng Dumarao, Capiz bandang alas-8 Martes ng umaga.

Sa kanyang mga kuhang larawan, makikita ang pagbaha sa kalsada dulot ng Bagyong Agaton na nagresulta sa mga stranded na sasakyan at pasahero.

Makikita rin ang mga binahang terminal, establisyimento, kabahayan at sa mismong Dumarao Public Market na malapit lang sa kanila.

“Marami ng mga kababayan namin ang lumikas sa evacuation center. Mataas po kasi dito sa area namin pero sa ibang area malapit sa amin grabe na po ang baha," sabi ni Hachuela.

Sa mga larawang pinadala ni Bayan Patroller Hachuela bandang alas-2 ng hapon, makikitang unti-unti nang humupa ang baha at nakunan niya ang pagdating ng rescue sa mga binahang bahagi at paghatid ng pagkain sa mga na-stranded.

“Dito po sa Market, na-rescue na po, iyong ibang part po nang Dumarao, hindi pa. Marami din dito po ang may kailangan ng pagkain at tubig sa mga na-stranded at nag-evacuate,“ sabi niya.

Ayon sa PAGASA, namataan ang Bagyong Agaton malapit sa Llorente, Eastern Samar na may lakas ng hangin na nasa 45 kilometers per hour.

Nakataas pa din ang Tropical Cyclone Wind Signal No. 1 sa ilang lugar. Nagbabala ang PAGASA sa patuloy na pagbaha at landslide sa mga high-risk area.

• BASAHIN: 'Almost stationary' Agaton continues to bring rains over Visayas; Basyang exits PAR
• BASAHIN: 7,000 stranded in ports due to Agaton: coast guard