Matapos ianunsiyo nitong Martes ng umaga ang kaniyang intensiyong magbitiw sa puwesto sa katapusan ng taon, itinulak ng House of Representatives ang impeachment complaint laban kay Commission on Elections Chairman Juan Andres "Andy" Bautista.

Sa botong 137-75, nagdesisyon ang mga kongresista na baliktarin ang naunang pasya ng House justice committee na ibasura ang impeachment complaint laban kay Bautista matapos isalang ang report sa plenaryo. Dalawa ang nag-abstain sa botohan.

Itinuturing na "impeached" si Bautista at nakatakdang sumailalim sa paglilitis sa Senado na tatayo bilang impeachment court.

Sa kaniyang pahayag matapos ianunsiyo ang intensiyong magbitiw, sinabi ni Bautista na "bukas" pa rin siyang manatili sa puwesto sakaling alukin ni Pangulong Rodrigo Duterte.

Ayon kay House Speaker Pantaleon Alvarez, puwede pa namang makaiwas si Bautista sa impeachment trial kung magiging epektibo na agad ang pagbibitiw niya bilang pinuno ng Comelec.

"Baka naman nakatunog siya na matatalo siya sa plenaryo, inunahan niya ngayon ng resignation. Pero ginawa niyang end of the year. Siguro para to convince us na huwag nang ituloy ang deliberations sa plenary," ani Alvarez sa panayam sa "Dos por Dos" ng DZMM.

"Kung ang resignation niya effective immediately, wala na po kaming i-impeach."

'Masaklap'

pic.twitter.com/xldvZ266my

— Andy Bautista (@ChairAndyBau) October 11, 2017

Sa nilabas na reaksyon ni Bautista, sinabi nitong "unfortunate" ang naging desisyon ng mga kongresista, lalo na't ipinadala na umano niya ang resignation letter sa Palasyo.

Paliwanag niya, itinaon niya lamang sa katapusan ng taon ang pagbibitiw upang masiguro ang maayos na paglilipat ng responsibilidad sa kaniyang kapalit.

Tinawag niya ring "unnecessary" o hindi na kailangan ang ginawa ng mga kongresista.

Gayumpaman, sinabi niya na handa siyang sumailalim sa proseso ng impeachment ayon sa Saligang Batas.

Walang 'personal knowledge'

Ibinasura ng House committee on justice noong Setyembre 20 ang impeachment complaint laban kay Bautista dahil wala umanong "personal knowledge" sa mga alegasyon ang mga complainant na sina Ferdinand Topacio at Jacinto Paras.

Ang reklamo kay Bautista ay naglalaman ng iba't ibang akusasyon, isa na rito ang bintang ng sarili niyang asawa na meron siyang halos P1-bilyong tagong yaman.

Bago ang anunsiyong magbibitiw, nauna nang hinimok si Bautista ng mga kasamahang opisyal sa Comelec na lumiban muna sa trabaho o kaya'y tuluyan nang umalis sa puwesto.