MAYNILA—Isang 18-anyos na lalaki ang nasawi sa pamamaril sa isang burol sa Caloocan City nitong Huwebes ng madaling araw.

Sa morgue na inabutan ni Malou Ramos ang bangkay ng kaniyang anak na si Jecjec, matapos ito mabaril sa Bagong Barrio, Caloocan, alas-3 ng madaling araw.

Sa kuha ng CCTV ng Brgy. 153, makikitang naglalakad ang dalawang lalaki na nakasuot ng itim na t-shirt, sa direksyon ng isang puting tolda kung saang may burol na nagaganap.

Maya-maya pa, nagsitakbuhan na ang mga tao, habang may isang lalaki ang humandusay sa kalsada.

Isang tama ng bala sa dibdib ang kumitil sa buhay ni Jecjec.

• Principal patay sa pamamaril sa kaniyang bahay sa Albay

Ayon sa nakakita mismo sa krimen, minamanan muna ng dalawang lalaking suspek ang burol bago namaril sa lugar.

Hinala ng kaanak ng biktima, alitan sa rap battle ang ugat ng krimen.

"Hindi ko inaasahan na dati parang napapanood ko lang sa balita, hindi ko inaasahan na mangyayari pala sa amin iyon. Sobrang sakit ng ginawa niyo sa amin, parang hayop niyo po pinatay ang anak ko. Hindi po kami titigil hangga't hindi namin nakakamit 'yung hustisya sa ginawa niyo sa anak ko," ani Ramos.

Tinutugis na umano ng mga pulis ang dalawang salarin.—Ulat ni Lyza Aquino, ABS-CBN News