MANILA – Paano nga ba makakaiwas ang publiko sa food poisoning?

Sa programang “Sakto” sa TeleRadyo, nagbigay ng tips ang infectious disease specialist na si Dr. Rey Salinel kung paano makakaiwas sa sakit dulot ng food poisoning, kasunod ng pagkakasugod sa ospital ng 97 na estudyante at guro sa Sablayan, Occidental Mindoro matapos kumain ng lumpia.

• 97 fall ill in lumpia food poisoning incident in Sablayan, 31 still in hospital
• DepEd to probe suspected food poisoning in Occidental Mindoro school

Para kay Salinel, importante na malinis at sariwa ang binibiling mga sangkap sa lulutuing pagkain.

Pero diin niya, higit na importante sa lahat ang pagsiguro sa kalinisan ng lugar at gamit sa pagluluto.

“Sa mga chef natin dyan, mga assistant chef, yung mga cook natin po dyaan, yun pong kitchen helper, aba, dapat po particular kayo sa kalinisan po sa inyo pong kinasasakupan per kitchen. Dapat po iba po ang kutsilyo sa meat, iba ang kutsilyo sa isda, iba ang kutsilyo sa gulay,” aniya.

“Kinakailangan every after chop-chop mo dyan, nililinis mong mabuti yung inyo pong sangkalan, yung cutting board.”

“Tapos siyempre yung paligid mo malinis at yung kamay mo, dapat palagi pong malinis,” dagdag pa niya.

Payo naman ni Salinel, kapag nakaranas ng food poisoning, importanteng pumunta agad sa doktor para maresetahan ng tamang gamot.

Dagdag pa niya, importante ang madalas na pag-inom ng tubig para hindi ma-dehydrate sakaling makaranas ng pagtatae.

--TeleRadyo, 13 Oktubre 2022