Sa kauna-unahang episode ng 'Balitang K,' tinalakay ang buhay ng personalidad na naging matunog ang pangalan noong dekada 90, si Leo Echegaray.

Hinatulan ng parusang kamatayan si Echegaray noong 1994 matapos halayin umano niya ang 10 taong gulang na batang anak ng kaniyang kinakasama.

Kinumpirma ng Korte Suprema noong Hunyo 25, 1996 na siya ang kauna-unahang death convict nang ibalik ang death penalty sa bansa noong 1993 sa ilalim ng administrasyon ni Pangulong Fidel V. Ramos.

Ibinalik ang parusang kamatayan dahil sa sunod-sunod na karahasan sa bansa noong panahong iyon.

Sa naging panayam ng ABS-CBN News kay Echegaray noong 1996, mariin niyang itinatanggi ang krimen.

"Malayong malayo talaga eh, kasi ano ho 'yun eh, makikita naman po sa medico legal ng Camp Crame ho eh na walang rape na nangyari," ani Echegaray.

Nanindigan naman ang hukom na nagpataw ng death sentence kay Echegaray na ginawa niya mismo ang krimen.

"Walang kaduda-duda, hanggang sa kahuli-hulihang sandali hindi nagbago ng paninindigan 'yung bata," pagdidiin ni Judge Maximiano Asuncion.

Tatlong taon makalipas o noong Pebrero 5, 1999 ay ipinataw ang parusang kamatayan sa kaniya sa pamamagitan ng lethal injection.

Panoorin ang kabuuan ng ulat sa kaso ni Leo Echegaray, maging ang iba pang mga ulat gaya ng concert ni Michael Jackson sa Pilipinas, basketbolistang si Botchok de los Santos na nagkaroon ng sakit na leprosy, at ang problemang kinaharap ng artistang si Amanda Page sa programang 'Balitang K' na unang ipinalabas sa ABS-CBN Channel 2 noong Hulyo 8, 1996.

RELATED LINKS:

• Lethal injection: Most humane way of execution
• 3 kaanak ni Leo Echegaray, timbog sa QC buy-bust