MAYNILA—Wala daw umanong kinalaman sa kaso ni Sen. Leila de Lima ang pagbawi ng mga alegasyon laban sa kaniya ng umaming drug lord na si Kerwin Espinosa.

Sa isang counter-affidavit na inilabas sa publiko nitong Huwebes, sinabi ni Espinosa na walang katotohanan ang kaniyang mga paratang kay De Lima na tumatanggap ito ng pera kapalit ng drug dealing protection.

Pinilit lang umano siyang sabihin ito sa mga Senate hearing noong 2016.

• 'Not true': Kerwin Espinosa recants all allegations vs De Lima, says lawyer
• De Lima camp mulls charges vs people who implicated her in drug trade

Pero ayon kay Ben Malcontento, prosecutor general, "self-preservation" ang hakbang na ginawa ng drug lord, na nadala lang raw ng "media impact" kaya niya nagawa ito.

Aniya, nag-testigo lang si Espinosa laban kay De Lima sa Senado noon at hindi sa husgado o sa Department of Justice kaya dapat hayaan ang korte na magedesisyon sa mga kaso ni De Lima.

Pilit ni Malcontento, malakas ang kanilang kaso laban kay De Lima. Sabi pa ng prosecutor general, pangalanan ni Espinosa sa kung sino nag pumilit dito noong 2016.

Kinumpirma naman ni Malcontento na hawak ng DOJ ang prosecution pero "independent" umano ang kanilang imbestigasyon laban sa senador, na isa sa mga pinakamatinding kritiko ni Pangulong Rodrigo Duterte.—SRO, TeleRadyo, Abril 28, 2022