MAYNILA (UPDATE) — Viral ngayon ang isang Facebook post kung saan isang bata ang nakaligtas sa landslide sa Baybay City, Leyte matapos ang paghagupit ng Bagyong Agaton.

Nakita ng mga rescuers na bali na ang kaliwang binti ni CJ Jasme, 11 anyos, sa Barangay Kantagnos kaya ipinasok siya sa isang sirang ref bago itinawid sa ilog.

"Nakita ko 'yung paa niya na bali na. Nilagyan ko ng splint, kawayan, at saka may mga tela doon. T'saka humingi ako ng tulong sa mga kasama ko. Nilagay namin siya sa isang ref na sira," ani SFO2 Romulo Mascarinas ng Baybay City Fire Station sa panayam ng ABS-CBN News.

Unang sambit ng bata ay nagugutom siya nang matagpuan ng mga awtoridad.

"Parang nahabag 'yung puso ko noon kasi umaga pa 'yun nangyari tapos nakuha namin mga 12 to 1," ani Mascarinas.

Ayon kay Juanito Orellano Jr., guardian ng bata, napag-alaman lang din nila na nilagay ng mga responder ang bata sa loob ng ref.

"May nagsabi naman sa iba na may mga volunteer doon na pumunta na mga civilian, pati 'yung mga second responder, nakita nila [ang bata], nilagay nila sa ref," aniya sa panayam sa TeleRadyo Lunes.

Kasalukuyang nagpapagaling ang bata sa ospital.

Nasawi sa landslide ang mga magulang at isang kapatid ni Jasme. Nakaligtas naman ang isa niyang kapatid matapos makahawak sa isang container nang anurin sa ilog.

Kuwento ni Roselyn Jasme-Orellano, tiyahin ng bata, sinubukan pa ng ama ng bata na iligtas ang anak pero bigong makaligtas ang ama.

• Dozens still missing as 'Agaton' death toll rises to 175

Base sa huling ulat ng National Disaster Risk Reduction and Management Council, 175 ang nasawi dahil sa mga pagbaha at landslide na idinulot ng Bagyong Agaton.

Walo ang sugatan habang nasa 110 ang patuloy na pinaghahanap ng mga awtoridad, ayon sa ahensiya.

KAUGNAY NA ULAT

Watch more News on iWantTFC

— May ulat ni Sharon Evite