2 kritikal, 14 na-ospital matapos umanong malason ng lambanog

ABS-CBN News

Posted at Dec 06 2018 05:55 AM

MAYNILA - Kritikal ang kalagayan ng 2 tricycle driver habang inoobserbahan pa ang 14 na iba pa matapos umanong malason sa ininom na lambanog.

Sama-sama sa isang kuwarto sa East Avenue Medical Center ang mga tricycle driver ng Tricycle Operators and Drivers Association (TODA) ng San Bartolome sa Novaliches, Quezon City.

May ilang nakahiga dahil bahagya pa ring nanghihina, pero mas marami ang masigla na ang katawan.

Pangalawang buhay kung ituring ng mga biktima ang kanilang pagkaligtas sa peligrong kumitil ng buhay ng 4 nilang kasamahan.

Dinala sa ospital ang mga biktima nitong Martes matapos pumanaw sila Dennis Cuadra, Crispulo Mateo, Alvin Reyes, at Delfin Bayangos. 

"'Di na po sumasakit ang tiyan ko. 'Di na po nakakaramdam ng pagsusuka. Maayos na pakiramdam ko, gutom nalang talaga," ani Reynold Subala.

Nasa kritikal naman na kondisyon sina Alfredo Cuadra at Alfredo Faustino.

Dinala na sa crime laboratory ang natirang lambanog para masuri.

Nakuhanan na rin ng pulisya ng pahayag ang nagbigay umano ng lambanog sa mga tricycle driver. - ulat ni Isay Reyes, ABS-CBN News

Bisitahin ang Patrol.PH para sa iba pang mga balita.