Ulysses nagdulot ng baha, pagguho sa Quezon province

ABS-CBN News

Posted at Nov 12 2020 01:00 PM | Updated as of Nov 12 2020 08:16 PM

Nagkaroon ng pagguho ng lupa sa Real, Quezon kasunod ng pananalasa doon ng bagyong Ulysses. Angel Movido, ABS-CBN News

(UPDATE) Nagdulot ng pagbaha, pagguho ng lupa, at kawalan ng kuryente ang bagyong Ulysses sa ilang lugar sa Quezon province.

Magdamag naranasan ang malakas na hangin at pag-ulan sa lalawigan, kung saan 3 beses nag-landfall ang Bagyong Ulysses nitong madaling araw ng Huwebes.

Noong umaga, tumambad sa mga residente ang baha, at mga nagkalat na sanga ng puno at debris sa kalsada. Mayroon ding mga nabuwal na puno at natumbang mga poste ng kuryente.

Watch more in iWantTFC

Bago magtanghali ngayong Huwebes, wala pa ring kuryente sa ilang lugar sa lalawigan — partikular sa mga bayan ng Infanta, Real, at General Nakar — matapos putulin ng Quezon Electric Cooperative Inc. ang supply noong gabi ng Miyerkoles bilang pag-iingat laban sa bagyo.

Nakapagtala rin ng 2 landslide o pagguho sa mga barangay ng Tanuan at Tagnoan sa Real, dahilan para ilikas ang 142 pamilya.

Sa panayam sa ANC, sinabi ni Quezon Governor Danilo Suarez na higit 13,000 pamilya o 70,000 indibidwal ang apektado ng mga pagbaha sa Infanta, Real, at General Nakar.

Binaha naman ang Maharlika Highway sa Lucena City at Catanauan dahil sa storm surge.

Hindi rin madaanan ang highway patungo sa Calauag at Lopez dahil hindi pa tuluyang humuhupa ang baha.

Wala naman napaulat na casualty sa buong lalawigan ng Quezon.

Bukod sa ayuda para pampagawa ulit ng mga nasirang bahay, nanawagan din ang mga taga-Quezon para sa pagkain, tubig, vitamins, at face masks. 

Sa ulat ng PAGASA alas-11 ng umaga, namataan ang Bagyong Ulysses sa West Philippine Sea sa silangan ng Zambales.

Posible umanong lumabas ang bagyo sa Philippine area of responsibility sa Biyernes. -- Ulat nina Angel Movido at Jorge Cariño, ABS-CBN News

Bisitahin ang Patrol.PH para sa iba pang mga balita.