Watch more News on iWantTFC

Nakuhanan ng video ng residenteng si Perry Benedictos ang pagragasa ng baha sa Barangay Bugo, Cagayan de Oro City, Linggo ng hapon.

Kita sa video ang malakas na agos ng baha na tumangay pa ng isang motorsiklo.

Kuwento ni Benedictos, unang insidente ito ng malakas na baha sa kanilang komunidad magmula nang tumira siya rito taong 1994.

Halos umabot na rin ang baha sa bubungan ng mga bahay sa nasabing barangay, base sa video na kuha ng residenteng si Lecar Mae Lazatin.
Kabilang si Lazatin sa ilang mga residenteng umakyat na sa bubong dahil sa taas ng tubig-baha.

Batay sa datos ng Cagayan de Oro City social welfare and development office, mahigit 700 na pamilya ang apektado ng baha.

Karamihan sa kanila ay lumikas noong Linggo sa mga paaralan at barangay gym.

• State of calamity idineklara sa Sta. Ana, Cagayan dahil sa 'Neneng'

Namahagi na ng pagkain mula sa community kitchen ang CSWD bilang paunang tulong sa mga apektado ng baha.

Nakaranas ng pag-ulan ang lungsod dahil sa localized thunderstorms.—Ulat ni Hernel Tocmo