• Mocha Uson, muling iginiit na blogger siya at di journalist
• Thinking Pinoy: DFA needs me more than I need them
• 2 dating opisyal, itinangging may kinalaman sa #SilentNoMorePH
• News sources, hinimok na magpakalat ng tamang impormasyon

Mahigit limang oras tumagal ang pagdinig ng komite ng Senado tungkol sa isyu ng fake news o pekeng balita.

Sa pagdinig, inireklamo agad ni Communications Assistant Secretary Mocha Uson na fake news ang report tungkol sa appointment niya sa Bureau of Customs at pagse-selfie sa mosque sa Marawi City.

"Katulad po diyan ng GMA na rin. Noong sinamahan ko si Pangulong Duterte doon, sinabi po ng GMA na ako po ay nag-selfie sa loob ng Grand Mosque sa Marawi na naka-boots. Hindi naman po ako nag-selfie doon. At dahil po doon, na-bash po ako... Hindi niyo po kinuha ang side ko," dagdag ni Uson.

Buwelta naman ni Senador Bam Aquino, "sa dinami-daming blog mo tungkol sa'min dito, may isang beses ba na humingi ka ng side namin?"

Tugon ni Mocha, "with all due respect, di po ako journalist... blogger po ako."

Bahagya ring nagkaroon ng tawanan nang muntik nang masabi ni Uson na mayroon siyang karapatan laban sa "self-discrimination" sa halip na "self-incrimination" o pagdidiin sa sarili.

Inisa-isa naman ni Senador Antonio Trillanes IV ang mga fake news na inilabas ni Uson sa kaniyang blog.

Gaya ng ginamit niyang retrato ng Honduran soldiers noong kasagsagan ng giyera sa Marawi at paghamon sa oposisyon noong kainitan ng Kian Delos Santos killing na dalawin din ang napatay na pulis na noong isang taon pa pala namatay.

"Hindi man po maayos ang interpretasyon ko, pero 'yon lang po ang ibig kong sabihin," ani Uson.

"Bakit hindi na lang umamin na 'yon nga, na nagkamali?" sagot naman ni Trillanes kay Uson.

'Thinking Pinoy'

Kinompronta rin ni Trillanes si RJ Nieto o alyas "Thinking Pinoy" sa pagse-selfie niya at kaibigang si Mark Lopez na tila nagdiriwang sa harap ng tanggapan ng nakulong na si Senador Leila de Lima.

Tinanong ni Trillanes kung hihingi ba ng tawad si Nieto.

"No, sir. Masaya po kaming naka-detain siya... and I'm entitled to my own political opinion," sagot ni Nieto.

"Yes, you're entitled to your own sick opinion," tugon ni Trillanes kay Nieto.

Giit nina Uson at Nieto, karapatan pa rin nilang mag-blog dahil walang nagsasabing bawal ito sa kanila.

Si Nieto na consultant ng Department of Foreign Affairs, handa raw iwan ang puwesto nya na P12,000 lang naman ang suweldo.

"I don't want to work in DFA, parang alila lang kami doon e. And I only get P12,000. It's not even enough to pay for taxi. It's just that DFA needs me more than I need them. And I want to help the government succeed. Hindi po ako nagyayabang. I'm just helping them, because I have 700,000 followers," ani Nieto.

"If you somehow think, or anybody here can prove na I'm breaking laws by doing those two things, then let's talk about it. Then if it's necessary, I'll resign," dagdag ni Nieto.

• BASAHIN: Mocha, 'Thinking Pinoy', pinaalalahanan sa pagiging gov't worker

Hirit naman ni Senador Risa Hontiveros, "sinabi ni Secretary Andanar, bloggers have to follow journalists' Code of Ethics."

"That is the opinion of Secretary Andanar, but it is not yet a policy... Not yet in writing, ma'am," sagot ni Presidential Communications Group Assistant Secretary Ana Maria Banaag.

Pero may buwelta sa kanila si Senador Nancy Binay.

"Since we're all government officials, we are bound by R.A. 6713. And under Section 4, nakasulat doon na we cannot use the excuse of doing things in our capacity as a private individual," ani Binay.

'#SilentNoMorePH'

Itinuro naman ni Nieto ang blogger mga nasa likod umano ng "#SilentNoMorePH" na nagsulat na ayaw pumirma ng pitong administration senators sa resolusyong kumokondena sa extrajudicial killings.

Ayon kay Nieto, tauhan sila dati nina Senador Kiko Pangilinan at Bam Aquino na kapwa naman itinanggi ng dalawa.

Dalawang dating Palace officials din ang kinompronta ni Senadora Cynthia Villar na nagharap ng dokumento raw na nag-uugnay sa kanila sa #SilentNoMorePH.

Tinanong ni Villar sina dating Presidential Spokesperson Edwin Lacierda at dating Deputy Presidential Spokesperson Abigail Valte kung bahagi nga ba sila ng grupo.

"I can categorically say that I have nothing to do with the seven sens [seven senators in the article]," ani Lacierda.

"I do not own the blog, I do not contribute to the blog. If and when I have spoken about government and about political personalities, I have done it through my named assets," tugon naman ni Valte.

Media literacy

Iginiit ng mga ekspertong humarap sa pagdinig na importanteng palaganapin ang media literacy sa bansa.

Obligasyon din ng news sources na magpakalat ng tamang impormasyon.

Binigyan-diin naman ng ABS-CBN News ang mahigpit na patakaran nito sa pagbabalita.

May ombudsman ang kompanyang gumigiya sa mga empleyado at nagdidisiplina sa mga nagkakamali.

Ang istorya ng Bureau of Customs appointment ni Uson, galing kay Nicanor Faeldon na noo'y Customs Commissioner.

"The reporter quoted Commissioner Faeldon. He was the one who said that Ms. Mocha Uson was going to be appointed. And then yes, it was wrong. Then I think you [Uson] gave a statement in your Facebook account. We published that it was a wrong information, and we corrected it with that statement," paliwanag ni Chi Almario-Gonzales, head ng ABS-CBN Standards and Practices. -- Ulat ni Sherrie Ann Torres, ABS-CBN News