Watch more in iWantv or TFC.tv

MAYNILA—Sa kulungan ang bagsak ng isang pulis matapos malambat sa isang entrapment operation ng Philippine National Police integrity and monitoring group sa isang kainan sa tapat ng Camp Crame sa Quezon City Martes.

Ayon kay Police Brig. Gen. Flynn Dognbo, direktor ng PNP-IMEG, may ranggong Police Master Sergeant ang lalaking suspek at nakatalaga sa PNP crime laboratory group.

Isinagawa ang entrapment matapos makatanggap ng reklamo hinggil sa ginagawang pangingikil umano sa isang aplikante ng PNP.

Tutulungan umano ng suspek ang biktima na malagay ang kaniyang pangalan sa listahan ng mga pumasang aplikante, kapalit ang P6,000. Sa darating na Biyernes na kasi ang oath-taking ng mga bagong recruit na mga pulis.

• Pulis sinibak sa serbisyo dahil sa pangingikil umano sa mga police applicant

Pumayag makipagkita ang biktima at nang magpositibo na ang transaksyon ay dun na hinuli ng mga awtoridad ang suspek.

• Pulis, 4 iba pa timbog sa umano'y pangingikil sa Pampanga

Mahaharap ang suspek sa kasong robbery extortion, paglabag sa Republic Act 6713 at Republic Act 3019, o Anti-Graft and Corrupt Practices Act.

Ayon naman kay PNP Chief Guillermo Eleazar, pinaiimbestigahan na niya ang insidente upang masigurong hindi mababahiran ng anuman katiwalian ang proseso ng recruitment ng PNP.