Watch more in iWantv or TFC.tv

May grupong nagtangkang manuhol sa kaniyang opisina para hindi paalisin ang mga vendor sa Divisoria, ayon kay Manila Mayor Francisco "Isko" Moreno.

Kasunod ito ng pagsisimula ng kaniyang kampanya para wakasan ang pangongotong at linisan ang "dugyot" o maruming lungsod sa pagsisimula ng kaniyang administrasyon.

• Mayor-elect Isko 'poposasan' ang mga kapitan na sangkot sa illegal parking, kotong
• 'Dugyot' days numbered? Isko Moreno to embark on Manila cleanup

Ayon kay Moreno, nagpaparinig umano sa kaniya ang ilang grupo na babarayan siya ng P5 milyon kada araw para lang hindi mapatanggal ang mga vendor sa Divisoria.

"May mga ipinaparating daw sa akin na mensahe. Five million (pesos) a day... Kaya siguro mahirap linisin (ang kalsada)," anang alkalde.

Bagaman hindi direkta sa kaniya ipinaparating ang panunuhol, tukoy raw ni Moreno kung sino ang mga nasa likod nito.

Ayon sa isang tindera sa Divisoria, ang mga organizer umano ang nakikipag-usap sa mga kawani ng city hall sa umano'y panunuhol.

Sa pagsisimula rin ng unang linggo ni Moreno sa opisina, puspusan din ang mga clearing operation ng pulisya para tuluyang madaanan ang mga kalsada ng Divisoria.

Ongoing Clearing Ops sa Divisoria. Ilang tindahan, binugahan na ng tubig mula sa Firetruck pic.twitter.com/VcevPo59d6

— zyann ambrosio (@ZyannAmbrosio) July 2, 2019

Nadiskubre pa nila na bumara nang husto ang mga basura ng mga vendor kaya binugahan na ng tubig mula sa firetruck ang mga kalsada rito.

Naaresto rin sa Blumentritt, Maynila sa entrapment operation ang dalawa umanong nagpapanggap na kolektor sa city hall na naniningil sa mga vendor.

Hamon naman ni Moreno sa mga mangongotong na huwag siyang subukan.

"Hindi ako nagkulang sa inyo sa babala ha," ani Moreno.

Dahil sa sunod-sunod na operasyon, pansamantalang nanatili ang ilang vendor sa Delpan sa Tondo. --Ulat ni Zyann Ambrosio, ABS-CBN News