Nagbabala ang Department of Health (DOH) sa mga gumagamit ng vape at e-cigarettes, lalo na sa mga kabataan, na iwasan ang paggamit ng mga produktong ito dahil mayroon pa ring dalang peligro ang mga ito.

Napag-alaman ng Food and Drug Administration na naglalaman pa rin ng tobacco ang vape at e-cigarettes.

Ibig sabihin, matatagpuan pa rin sa vape ang 7,000 delikadong kemikal na mayroon sa sigarilyo, ayon sa DOH.

"Walang safe level ng exposure to tobacco smoke, so maski kaunti lang iyan, it is still unsafe," ani Health Secretary Paulyn Ubial.

Inilabas ang babalang ito kaugnay ng paggunita sa buwan ng Hunyo bilang 'National No Smoking Month'.

Sa kamakailang pinirmahang Executive Order 26 na nagbabawal sa paninigarilyo sa mga pampublikong lugar, hindi umano saklaw ng batas ang vape.

Gayunpaman, hindi pa rin mapipigilan ang mga establisimiyento na ipagbawal ang mga ito, ayon kay DOH Assistant Secretary Eric Tayag.

• BASAHIN: 'Vapes' not covered by smoking ban EO but...

Posible namang matapos na sa unang linggo ng Hulyo ang implementing rules and regulations ng executive order na nagbabawal sa paninigarilyo sa mga pampublikong lugar, ayon kay Ubial.

Ito ay bilang paghahanda sa pagpapatupad sa nasabing batas sa Hulyo 16.

Matatandaang pinirmahan ni Pangulong Rodrigo Duterte noong Mayo ang batas na ito na nagsasaad na bawal manigarilyo sa mga pampublikong lugar gaya ng paaralan, opisina, bangketa, at mga pampublikong sasakyan.

• Saan bawal manigarilyo?

Sa ilalim din ng batas na ito, bawal gumamit, magbenta, o pagbentahan ang mga kabataan ng sigarilyo.

• ALAMIN: Ano ang saklaw ng nationwide smoking ban?

-- Ulat ni Kori Quintos, ABS-CBN News