MAYNILA - Patay ang isang kawani ng Bureau of Fire Protection (BFP) sa isinagawang buy-bust operation ng awtoridad sa Barangay Rizal sa Sogod, Southern Leyte noong Miyerkoles ng umaga.

Nakilala ang namatay na suspek na si Jody Daclan Magallanes, 40 anyos at nakatalaga sa Mahaplag Fire Station.

Nakabili umano ang nagpanggap na buyer mula sa suspek ng isang pirasong plastic sachet ng hinihinalang shabu na nagkakahalaga ng P70,000.

• Higit P210-M halaga ng shabu nasabat sa Las Piñas buy-bust; 2 patay

Pero nakatunog umano ang suspek na pulis ang kaniyang katransaksiyon, bumunot ng kalibre .45 na baril at pinaputukan ang awtoridad.

Nakaganti naman ang operating team at nabaril ang suspek.

Dinala pa ang suspek sa Sogod District Hospital ngunit idineklara na itong patay ng mga doktor.

Nakuha sa lugar ang sachet ng hinihinalang shabu, baril na ginamit ng suspek, at isang brown coin purse.

Ayon sa awtoridad, itinuturing ang suspek na high-value target at top 2 drug personality sa Southern Leyte.

- Ulat ni Ranulfo Docdocan