Watch more in iWantv or TFC.tv

MAYNILA—Dinampot ng pulisya ang Ex-O ng isang barangay sa Sampaloc, sa lungsod na ito matapos ireklamo ng pamilya ng isang menor de edad nitong Miyerkoles.

Tinangka umano niyang gahasain ang 13-anyos na dalagita na anak ng isa ring nagtatrabaho sa kanilang barangay. Nangyari umano ang pangmomolestiya sa barangay hall at nakuhanan pa ng CCTV.

Karga-karga ng 45-anyos na suspek ang biktima na walang suot pambaba pagpasok sa barangay hall.

• Most wanted sa N. Samar dahil sa umano'y panggagahasa arestado

Ayon kay Police Lt. Col. Gene Licud, commander ng Sampaloc Police, isa pang taga-barangay ang nakapansin sa kanila at sumunod sa loob ng barangay hall kaya naagapan ang panggagahasa.

Todo depensa ang suspek na wala siyang ginawa dahil naaawa siya sa dalagita at ang biktima pa umano ang naghubad at nag-aya sa kanya.

Pero ayon sa pamilya ng biktima, mag-iigib lang sana ng tubig ang dalagita nang bigla umano siyang hawakan ng suspek.

Kakasuhan ng attempted rape ang barangay Ex-O.

• Lalaki tiklo sa umano’y panggagahasa ng 15 anyos na babae sa Bulacan

Hinihikayat ng pulisya ang mga barangay na higpitan ang pagpili ng mga magsisilbi sa barangay, tulad ng pagdadagdag ng neuro-psychiatric exam, para masiyasat nang mabuti ang pagkatao ng mga magiging alagad ng batas.--Ulat ni Lady Vicencio, ABS-CBN News