Nawasak ang mga bahay at iba pang istruktura sa mga coastal area sa Samar dahil sa pananalasa ng Bagyong Bising.

Sa bayan ng San Roque, Northern Samar, nasira ang mga bahay sa Barangay Lao-angan matapos hampasin ng malalaking alon dulot ng bagyo.

Sinira rin ng malalaking alon ang mga bahay sa karatig-bayan ng Pambujan.

Sa tala ng municipal disaster office, 18 bahay ang nawasak habang 132 naman ang "partially damaged."

Sa Eastern Samar, hindi nakaligtas sa hagupit ng bagyo ang mga cottage ng isang resort sa Barangay Canjaway, Borongan.

Nakuhanan pa ng video ni Dondon Cainto ang paghampas ng malalaking alon sa mga cottage.

Na-wash out din umano ang maliliit na tulay papunta sa mga cottage.

May nasira ring bahagi ng kalsada sa Barangay Lo-ok Proper sa bayan ng Lapinig, Northern Samar.

Sa mga retrato, makikita ang mga mahabang bitak sa Lapinig-Arteche Road, na resulta umano ng malakas na ulang dala ng bagyo.

Sa panayam sa Teleradyo, sinabi ni Northern Samar Governor Edwin Ongchuan na may mga lugar pa rin sa lalawigan na lubog sa baha dahil malapit sa mga ilog pero wala namang isolated.

Libo-libong pamilya sa Bicol Region at Eastern Visayas ang lumikas nitong mga nakaraang araw dahil sa Bagyong Bising. Ayon sa PAGASA, mababa ang tsansa na mag-landfall ito ngunit binalaan pa rin ang mga nasa eastern seaboard ng bansa sa maaaring epekto ng mga pag-ulan at hagupit ng hangin.

• Libo-libong pamilya lumikas dahil sa Bagyong Bising

— May ulat ni Ranulfo Docdocan

RELATED VIDEO:

Watch more in iWantv or TFC.tv