Watch more in iWantv or TFC.tv

Editor's Note: May mga tinatalakay na sensitibong paksa ang artikulong ito. Mahalaga ang wastong paggabay sa mga wala pa sa tamang edad o disposisyon para magbasa o umintindi ng ganitong mga bagay.

Maituturing na "rite of passage" para sa mga kalalakihan ang pagpapatuli, o pagtatanggal ng foreskin sa ari ng lalaki, bago ito maging teenager, o kaya ay habang sanggol pa ito.

Pero may mga hindi nagpapatuli, na umano ay maaaring magdulot ng samu't saring sakit. Pero maaari nga ba itong magdulot ng kanser?

• Di pagpapatuli, maaaring 'mauwi sa komplikasyon sa ari, pagtatalik'

Ayon sa urologist na si Joseph Lee, ang pagkakaroon ng kanser ang pinakamalubhang maaaring mangyari sa hindi pa tuli na lalaki.

Paliwanag ni Lee, maaaring magkaroon ng smegma o pag-iipon ng mga bakteria, libag sa foreskin ng isang lalaki na hindi pa natatanggal - na maaari raw magdulot ng kanser kapag hindi naagapan.

"Kung matagal na nagtatago sa area na naka-expose ang glans penis, may tendency na maaaring magdulot siya ng penile cancer, maaaring maipon ang bacteria ... kasi puwede 'yan maging medium for growth," aniya sa "Good Vibes" ng DZMM.

Kapag daw kasi may sobrang foreskin ang ari ng isang lalaki ay maaaring pamahayan ito ng mga bacteria at iba pang mga discharge na maaaring pagmulan pa ng ibang sakit.

"Minsan kasi pag sinasabi na may excessive foreskin maaaring (magdulot) ng bacteria infection, discharge na naiipon, bacterial infection na maaaring pagmulan ng diseases," ani Lee.

Ayon naman sa urologist, wala naman sa edad ang pagpapatuli basta aniya maaari nang simulan ang pagtutuli kung makita na naire-retract o naibabalik nang patalikod ang foreskin ng ari.