MAYNILA — Emosyonal ang mga pamilya ng mga nawawalang sabungero sa isinagawa nilang prayer vigil sa labas ng tanggapan ng Commission on Human Rights (CHR) sa Quezon City ngayong Martes.

Mga pamilya ng mga nawawalang sabungero emosyonal habang isinasagawa ang prayer vigil sa labas ng tanggapan ng Commission on Human Rights, sa Quezon City. pic.twitter.com/cWibRVz59T

— Raya Capulong (@RayaCapulong) February 15, 2022

Sa dasal na lang kumakapit ang mga pamilya na ilang buwan nang naghahanap at umaasang makikita pa ang mga nawawalang kaanak.

Nagsindi sila ng kandila, nagrosaryo at nagdasal na sana ay makita at makabalik na ang kanilang mga kaanak.

• Pagkawala ng 6 lalaki sa may sabungan iniimbestigahan

Kasabay ng pagbabahagi ng kanilang mga saloobin, labis din ang pagtangis ng mga kamag-anak.

Hinimatay pa si Aling Carmen Malaca dahil sa paghihinagpis sa pagkawala ng anak sa isang sabungan sa Batangas.

Hati rin ang reaksyon ng mga pamilya sa itinatakbo ng imbestigasyon ng mga awtoridad.

Nanawagan ang mga pamilya kay Pangulo Rodrigo Duterte na tulungan silang mahanap ang kanilang mga kaanak.

Giit ng mga pamilya, hindi sila mapapagod at patuloy silang lalapit sa iba't-ibang ahensya ng gobyerno upang magpatulong na mahanap ang mga nawawalang sabungero.