TINGNAN: Sanitation at disinfection sa Quiapo Church sa pista ng Poong Nazareno

ABS-CBN News

Posted at Jan 09 2021 03:58 PM

MAYNILA - Ipinasilip ni Manila Mayor Isko Moreno ang ginagawang disinfection sa loob ng Quiapo Church matapos ang kada misa para sa paggunita ng pista ng Itim na Poong Nazareno Sabado.

 

Sa kaniyang personal na Facebook page, nagbahagi si Moreno ng ilang lararwang nagpapakita kung papaano isinasagawa ang sanitation at disinfection sa mga upuan sa simbahan bilang pagtugon sa public health protocols laban sa pagkalat ng COVID-19.

Tanging 400 katao lamang ang pinapayagang makapasok sa loob ng simbahan kada misa. 

May mga loudspeaker at LED screen naman sa labas ng simbahan para sa mga deboto sa labas ng simbahan.

Bukod sa Quiapo Church, maaring bisitahin din ng mga deboto ang Sta. Cruz Church at San Sebastian Church sa Maynila kung saan nandoon ang dalawang replica ng Poong Nazareno.

Kanselado ang taunang Traslacion ng Poong Nazareno upang maiwasan ang pagkalat ng COVID-19. Sa halip, mga Misa ang idinaraos bilang paggunita sa pista.