Mukhang masusundan ang children's book na "Ako Ay May Titi," ang librong nag-viral kamakailan lang sa social media dahil sa tahasang mensahe nitong pangangalaga sa ari ng mga kalalakihan.

Ipinakita nitong Martes ng Lampara Books ang character sketch ng "Ako Ay May Kiki," ang ikalawang installment ng librong isinulat ni Genardo Gojo Cruz at iginuhit ni Beth Parrocha.

Bibigyang-pansin naman nito ang pag-iingat ng mga kababaihan sa kanilang ari.

Ikinatuwa ng maraming netizen ang unang libro, dahil sa mensaheng gusto nitong iparating sa mga kabataan at sa aral na mapupulot mula sa kuwento.

Mahalaga na mapag-usapan ng maraming magulang at kanilang mga anak ang itinuturing na sensitibong paksa, ayon sa Lampara Books.

“Nakasanayan na kasi natin na mahiya sa usapin ng bahaging ito ng katawan pero paano malalaman ng mga batang lalaki ang pag-iingat sa kanilang titi kung hindi natin sila tuturuan," ayon sa Facebook post ng publishing house tungkol sa librong 'Ako Ay May Titi.'

Naubos agad ang stock ng unang libro, isang linggo matapos ito i-release ng Lampara Books.

• ‘Ako ay May Titi’: Children’s book seeks to educate young boys on caring for genitals