Napaiyak sa tuwa ang isang babaeng online seller sa Masbate nang malamang pumasa siya sa Licensure Examination for Teachers (LET) dahil sa pagbati sa kaniya ng mga buyer habang nagla-live selling siya.

Noong una'y hindi makapaniwala si Jerlyn Esteves, 30, na nakapasa siya sa exam para maging guro dahil hindi aniya siya nakapag-review nang maayos sa sobrang pagkaabala sa online selling.

Watch more in iWantv or TFC.tv

"Walang review-review dahil super busy sa small business. Pinaubaya ko kay God ang 'pag exam ko," kuwento ni Esteves sa ABS-CBN News.

Hiningan pa niya ng retrato ang buyer na unang nag-congratulate sa kaniya bilang patunay sa sinasabi nitong pagpasa niya. Doon umano niya nakita ang kaniyang pangalan sa hanay ng mga pumasa.

• 20,811 pass January 2022 Licensure Examination for Teachers

Hindi umano ito ang unang beses na kumuha si Esteves ng LET.

Noong 2019, todo-handa umano si Esteves para sa exam pero hindi siya pinalad na makapasa.

"Kahit sobrang preparado ka sa exam, kung hindi pa para sa 'yo, 'di pa ibibigay. Pero kung time mo na talaga, kahit 'di mo alam ang sinagot mo doon, pagdating kay Lord, pasado ka," ani Esteves.

Lubos ang pasasalamat ni Esteves sa mga taong walang sawang sumuporta sa kaniya sa kabila ng mga pinagdaanang hamon ng kanilang pamilya, lalo nitong panahon ng pandemya.

• Couple goals: Magkasintahan sa Leyte, parehong magna cum laude at topnotcher

— Ulat ni Aireen Perol