BALIKAN: Istorya ng tagumpay ni Jovit Baldivino

Mario Dumaual, ABS-CBN News

Posted at Dec 09 2022 10:55 PM

Watch more News on iWantTFC

Parang kailan lang nang pumaimbulog ang Batanguenong tindero ng siomai na si Jovit Baldivino bilang unang kampeon ng ABS-CBN talent competition na “Pilipinas Got Talent.”

Nagsilbing inspirasyon sa maraming kababayan ang kaniyang rags-to-riches na istorya. Minahal at tinangkilik siya ng maraming taon sa madamdamin niyang interpretasyon ng mga awit tungkol sa ligaya at sakit ng pag-ibig.

Kaya buhos ang gulat at kalungkutan sa loob at labas ng showbiz sa pagpananaw ni Jovit bandang alas quatro ng madaling araw sa isang ospital sa Batangas City. 

Noong October 16 lang siya nag 29 anyos. 

Ayon sa kanyang amang si Larry Baldivino, ilang araw na na comatose ang singer kaugnay ng blood clot o pamumuo ng dugo sa kanyang ulo kasunod ng pagkanta niya sa isang Christmas party sa Batangas nitong huling weekend. 

Sumailalim din aniya si Jovit sa operasyon para mapawi ang komplikasyon ng aneurysm. 

Ibinunyag din ni Baldivino na una nang na mild stroke si Jovit noong November 22 na nalagpasan niya sa pahinga sa bahay. Ito’y hanggang mag guest siya sa okasyon kung saan nadale siya ng sakit. 

Napakasakit aniya ang paglisan ni Jovit pero ayon kay Baldivino, kumakapit sila sa kapangyarihan ng Panginoon at itinataas na lang nila ang kanilang kalungkutan sa Kanya. Alam din daw niya na natupad ang misyon ng anak na magpasaya ng maraming tao.