MAYNILA -- Umani ng papuri sa beteranong aktor na si Eddie Garcia ang mga baguhang aktor na sina Tony Labrusca, Liane Valentin, at Henz Villaraiz sa kanilang naging pagganap sa pelikulang "ML" na muling nagbabalik sa mga sinehan ngayong Nobyembre 7.

Matatandaan na isa ang "ML" sa mga pelikulang napansin sa Cinemalaya Film Festival.

Ayon sa beteranong aktor, malayo ang mararating ng mga baguhang aktor na kanyang nakasama sa "ML."

"They're very professional, they come prepared on the set, very punctual and all of them will go places," papuring tugon ng beteranong aktor.

Payo niya: "Be prompt, don't be a prima donna, be on time, prepared and love your job."

Samantala, labis din ang naging pasasalamat ni Eddie para sa patuloy na pagkilala sa kanya.

"Siyempre very excited when you win an award. Winning an award is bonus for a job well done," aniya.

Dahil sa hindi mabilang na kontribusyon sa larangan ng pelikula, hindi din naiwasan na maitanong kung ano ang kanyang saloobin kung iluluklok siya na maging isang National Artist.

"Well, it's up to them. Para sa akin kung ano ang dumating na grasya, tatanggapin ko," maikling pahayag ng beteranong aktor.

Sa ngayon balik-"Ang Probinsyano" ang aktor at excited din sa kanyang bagong pelikulang "Rainbows Sunset" na mapapanuod sa 2018 Metro Manila Film Festival.