MAYNILA – Upang makapagsimula muli, inamin ng aktres na si Ana Jalandoni na napatawad na niya ang dating kasintahan na si Kit Thompson sa ginawa nitong pananakit sa kaniya noon.

Sa isang press conference, hindi nakatakas si Jalandoni sa pag-usisa ng media tungkol kay Thompson.

Ayon sa kaniya, wala nang poot sa kaniyang puso at hinayaan na niya ang Diyos na gumabay sa mangyayari sa kaniyang buhay.

Dagdag pa nito, hindi makakatulong sa kaniyang pag-usad sa buhay kung magkikimkim pa rin ito ng galit sa kaniyang puso.

“Opo, napatawad ko na siya,” malumanay na sagot ni Jalandoni.

JUST IN: 'Napatawad ko na siya.'

This was Ana Jalandoni's statement when asked about her healing and moving-on process after the controversy with ex-boyfriend Kit Thompson.

Jalandoni is set to receive an award 'Most Empowered Celebrity'. pic.twitter.com/675FJHbKh0

— MJ Felipe (@mjfelipe) June 8, 2022

“Wala naman po akong galit. Ni-let go, and let God ko na po 'yun. Gusto ko na rin po mag-start para sa sarili ko. Hindi rin po makakatulong sa 'kin kung may galit ako sa puso ko. Alam ko po may mapupuntahan na maayos ang lahat.”

Inamin nito na mabigat sa simula ang proseso ng pagpapatawad ngunit mas nangibabaw ang kagustuhan niyang makapagsimula na ng buhay na gusto niya.

“I learned kasi to choose na magpatawad kasi 'yun naman 'yung tamang paraan para maka-move on, para maumpisahan 'yung bagong buhay na gusto ko,” sambit nito.

Sa ngayon, masaya naman umano ang kalagayan ni Jalandoni lalo pa’t sinusuportahan naman siya ng kaniyang pamilya, kaibigan, at management agency na Cornerstone Entertainment.

• Kit Thompson loses projects after controversy

Bagamat napatawad na si Thompson, tuloy pa rin aniya ang kaso na isinampa niya laban sa aktor.

“Gusto ko rin pong magtrabaho nang magtrabaho. So dun po ako naka-focus ngayon, sa trabaho. 'Yung case namin, iniiwan ko na lang po sa legal team ko,” paliwanag pa nito.

Matatandaang naging laman ng balita sina Jalandoni at Thompson nang arestuhin ang aktor dahil sa umano'y pambubugbog sa kaniyang nobya sa isang hotel sa Tagaytay.