Watch more in iWantv or TFC.tv

Kahit walang pasok sa gobyerno, nagbukas ang Bangko Sentral ng Pilipinas (BSP) nitong Martes para sa mga nais magpapalit ng lumang pera.

Nagbukas mula alas-8 ng umaga hanggang alas-12 ng tanghali ang mga sangay ng BSP para mabigyan ng pagkakataon ang mga nais magpapalit ng old bank notes o lumang perang papel sa New Generation Currency.

Isa sa mga humabol sa pagpalit si Junmark Manasis.

"Nakita namin may pera pa, sayang naman kaya dere-deretso na akong pumunta dito," ani Manasis.

Ang ilan sa mga tumungo sa tanggapan ng BSP ay mayroon nang bagong salapi pero bumalik matapos makahanap ng puwede pang ipagpalit.

Hanggang Disyembre 29 ang palugit bago tuluyang mawalan ng halaga ang lumang serye ng mga salapi.

• Lumang serye ng salapi, maaaring papalitan hanggang Disyembre 29 lang

Layunin ng kaunting pagbago sa disenyo ng bank notes, gaya ng pagkakaroon ng Braille marks at pagpapalit ng font size, na labanan ang pamemeke ng salapi.

Bukod sa bank notes, sinimulan na ring paikutin ang mga bagong P5, kasabay ng anibersaryo ng kapanganakan ni Andres Bonifacio noong Nobyembre 30.

• Bagong P5, may mukha ni Bonifacio

Confused? BSP says they made sure that new coin looks different with existing coins, they add that public needs to familiarize themselves with the new P5. More new coins will be released next year | via @jacquemanabat pic.twitter.com/0A09ZyCSHh

— ABS-CBN News (@ABSCBNNews) December 26, 2017

Subalit may ilang nalilito sa bagong barya dahil kakulay at halos kasing-sukat nito ang piso.

Ayon sa BSP, tiniyak nilang iba ang disenyo ng bagong P5 sa umiiral na barya.

"Ang mga bago na inilalabas natin, tina-try natin na wala dapat magkamukha sa ini-issue natin," ani Gratia Malic, deputy director ng BSP Currency Issue and Integrity Office.

"Sa tingin siguro nila parang magkamukha dahil hindi pa nila na-familiarize ang sarili nila sa [bagong] coin," dagdag ni Malic.

Dagdag ng BSP, mapapalitan na rin ang iba pang barya sa susunod na taon.

-- Ulat ni Jacque Manabat, ABS-CBN News