PALAUIG, Zambales — Nasa mahigit 2,800 puno ng mangga ang napinsala sa lalawigang ito matapos ang pananalasa ng bagyong Ulysses.

Hinaing ng mga mango farmers, dapat sana'y pipitasin na nila ang mga bunga sa susunod na buwan pero naglaglagan na ang mga ito at hindi na mapakikinabangan.

"Sobrang lakas ng hangin, nalaglag lahat. Tapos may matira man dyan, puro gasgas na. Paano pa namin mabebenta nang maganda yung presyo. Luging lugi na talaga," ani Val Arangorin, mango farmer.

"Balik sa umpisa, kapital ulit, makikipagsapalaran para mabuhay," dagdag niya.

Kada apat na buwan ang ani ng mangga sa Zambales.

Pero ang dapat sana'y aanihin sa Disyembre, na tinuturing na peak season, malaki na ang nawala.

Sa datos ng Zambales Provincial Disaster Risk Reduction and Management Office (PDRRMO), 2,857 puno ng mangga ang pinatumba o napinsala ng bagyo, o katumbas ng P9.5 milyon.

Ang mga mangingisda naman sa Iba, halos isang buwang walang kita dahil sa sunod-sunod na bagyo. Ito ang dahilan kaya gusto na nilang muling makapalaot.

"Dati rati itong November kumikita na kami niyan... Pero ito ngayon wala, dito lahat daan ng bagyo, hinaing ni Fernando Pisco, mangingisda .

Patuloy naman umano ang paggawa ng paraan ng lalawigan para maitawid ang kabuhayan ng mga residente.

• Higit P11 milyong pinsala sa agrikultura naitala sa Zambales dahil sa Ulysses

—Mula sa ulat ni Arra Perez, ABS-CBN News

Watch more in iWantv or TFC.tv