MAYNILA— Dumaraing ang mga jeepney driver at may-ari ng mga karinderya sa nagbabadyang taas-presyo sa LPG at gasolina.

"Pahirap po eh, sana pigilan nila ang mga pagtaas, ang lakas pa naman naming gumamit ng gasul," anang may-ari ng karinderya na si Ditas Macarasig.

Aabot sa P7.50 kada kilo ang inaasahang dagdag-presyo sa LPG sa mga susunod na araw.

• ALAMIN: Taas-presyo sa LPG sa Oktubre

Kasunod ng pakiusap ng gobyerno, hinati na sa P4 kada kilo ang aasahang dagdag ngayong araw, at lagpas P3 sa Oktubre 8.

Pero ang kabuuang dagdag, aabot sa mahigit P80 sa kada 11 kilogramo na tangke.

Kabado naman ang tsuper ng jeep gaya ni Joseph Bacud sa inaasahang oil price hike sa susunod na linggo.

Watch more in iWantv or TFC.tv

"Magkano na diesel? Wala nang maiiwan sa amin sa diesel na lang pinupuntahan... Baka 'di na kami bibiyahe sayang pagod," ani Bacud.

Sa datos mula Lunes hanggang Huwebes, pumapalo na sa halos P2 ang iminahal ng imported na diesel at kerosene at P1.39 naman sa gasolina.

Limang magkakasunod na linggo nang may oil price hike.

• Ika-4 sunod na oil price hike asahan sa Setyembre 21

Dahil dito, aapela na ang Department of Energy sa oil companies.

"Kukunsultahin natin ang oil players. Sila mag-decide kung staggered increase o magbibigay sila ng discount," ani DOE Director Rino Abad.

— Ulat ni Alvin Elchico, ABS-CBN News