Watch more in iWantv or TFC.tv

(UPDATE) Inanunsiyo ngayong Lunes ng Manila Electric Co. (Meralco) na magkakaroon ng pagtaas sa singil sa kuryente para sa August billing.

Ayon sa Meralco, P0.0965 kada kilowatt hour (kwh) ang dagdag-singil bunsod ng pagsipa ng transmission charge ng National Grid Corporation of the Philippines.

Ang naturang charge ay singil sa pagpapadala ng kuryente mula sa mga power plant papunta sa mga konsumer.

JUST IN!!

Singil sa kuryente ng Meralco, tataas na naman sa August billing ng P0.0965/kwh dahil sa pagsipa ng transmission charge dulot ng ancillary services ng NGCP.

Eto ang katumbas ng dagdag singil:
Kunsumo Dagdag
200kwh P19
300kwh P29
400kwh P39
500kwh P48 pic.twitter.com/tNbtUNYg9Y

— alvin elchico (@alvinelchico) August 9, 2021

Katumbas umano ito ng P19 dagdag sa mga kabahayang kumokonsumo ng 200 kwh, P29 sa konsumong 300 kwh, P39 sa konsumong 400 kwh, at P48 sa konsumong 500 kwh.

Ito na ang ika-5 sunod na buwang nagkaroon ng dagdag-singil sa kuryente.

Pero ayon sa Meralco, mas mababa pa rin ang kabuuang power rate ng Meralco kompara noong 2018 hanggang 2019 o bago mag-pandemya.

Ayon pa kay Meralco head of utility economics Larry Fernandez, posibleng bumaba ang presyo ng kuryente sa mga susunod na buwan dahil sa inaasahang pagbaba ng demand dulot ng enhanced community quarantine (ECQ).

Nauna nang inihayag ng Meralco na suspendido ang putulan ng kuryente sa mga lugar na nasa ilalim ng ECQ at modified ECQ.

• Meralco to suspend disconnection in areas under ECQ, MECQ

— Ulat ni Alvin Elchico, ABS-CBN News

RELATED VIDEO

Watch more in iWantv or TFC.tv