Dismayado ang mga nagde-deliver ng gulay sa Metro Manila dahil sa nalalapit na pagtaas ng singil sa toll sa North Luzon Expressway (NLEX).

Simula Hunyo 15, madadagdagan nang hindi bababa sa P7 ang toll fee ng mga sasakyang dumadaan sa open system ng NLEX o mula Metro Manila hanggang Marilao, Bulacan.

• NLEX toll fees to increase starting June 15

Nasa P33 naman ang dagdag para sa mga Class 1 vehicle na bibiyahe hanggang dulo ng NLEX sa Mabalacat, Pampanga at P81 kung Class 2 vechicle.

Ayon kay Louie Sarmiento, na nagbabagsak ng gulay mula Bulacan sa Balintawak Market sa Quezon City, dagdag-pasakit para sa mga tulad niyang biyahero ang taas-singil.

Hindi kasi umano nila agad maipapasa ang gastos sa kanilang mga kliyente.

"Kami munang mga may-ari ng sasakyan ang magdudusa. Kami ang papasan sa dagdag-toll fee," sabi ni Sarmiento.

"'Pag hindi na namin makaya saka kami hihirit sa mga sakay namin na kung puwede, puwedena kaming magtaas kaunti para mabawi-bawi namin 'yong dagdag gastos," dagdag niya.

Para naman kay Carlito Castillo, na galing pang Pangasinan ang dalang gulay, posibleng mauwi ito sa taas-presyo ng gulay sa mga palengke sa Metro Manila.

"Kawawa 'yong mga mamimili naman 'pag ganoon," aniya.

Hiling ng mga biyahero na huwag nang ituloy ang pagtaas ng toll fee o kaya'y huwag masyadong lakihan ang dagdag-singil.