MAYNILA - Tumaas nang P2 kada kilo o higit pa ang presyuhan ng bigas dahil sa patuloy na pagtaas ng presyo ng petrolyo, ayon sa isang grupo.

• Presyo ng gulay, bigas tataas pa rin kahit may rollback sa petrolyo - grupo

Ayon kay Bantay Bigas Spokesperson Cathy Estavillo, nasa P50 kada bag ang itinaas sa presyo ng bigas noong unang bugso ng serye ng oil price hikes dahil sa gastos sa transportasyon.

Ang dati mabibili aniyang P38 kada kilo naging P40 na ngayon.

Sa ilang palengke, may P37 hanggang P38 kada kilong bigas pero nag-iba na ang kalidad nito kumpara sa dati.

Watch more News on iWantTFC

Naapektuhan din umano ang presyo dahil aniya sa talamak na smuggling ng mga produktong agrikultura maging ang importasyon ng bigas.

"Nagtanong tayo sa retailers kapag panahon ng anihan, ramdam nila 'yung presyo ng bigas ay may konting pagbaba at nagiging steady. Ngayon, tapos na ang anihan natin, hindi nila naramdaman yung konting pagbaba ng presyo ng bigas," ani Estabillo,

"Kaya marami talaga yung nagsasabi na nagdadalawang isip na talaga na magtanim pa ba sila ng palay," dagdag niya.

Matatandaang tumaas nang P3 hanggang P4 ang presyo ng petrolyo nitong linggo dahil sa hindi pag-usad ng peace talks sa pagitan ng Ukraine at Russia, na pangunahing ugat ng mga taas-presyo ng oil prices nitong nakalipas na mga buwan.

Nauna na ring sinabi ng isang agricultural group na tataas ang presyo ng bigas.