Sinentensiyahan ng korte sa Kuwait ng kamatayan o bitay sa pamamagitan ng pagbibigti ang lalaking Lebanese at kaniyang misis na Syrian na idinadawit sa pagpatay sa isang Pinay household service worker (HSW).

• Kuwait court sentences couple to death for Filipina's murder

Ibinaba ng korte ang sentensiya sa unang pagdinig pa lang ng kasong pagpatay kay Joanna Demafelis, ang 29 anyos na natagpuan sa loob ng isang freezer sa inabandonang apartment sa Kuwait nitong Pebrero.

Hinihinalang isang taon nang patay si Demafelis nang matagpuan ang kaniyang bangkay.

• BALIKAN: Bangkay ng Pinay na natagpuan sa freezer sa Kuwait, kilala na

Ayon sa isang source ng Agence France-Presse, maaari pang iapela ng mag-asawa ang sentensiya kung sila'y babalik sa Kuwait.

Magkasunod na nahuli ang mag-asawa sa Damascus na kabisera ng Syria kasunod ng manhunt ng Interpol.

• BALIKAN: Mag-asawang suspek sa pagpatay kay Joanna Demafelis, hawak na ng mga awtoridad

Ipinaubaya ng mga awtoridad na Syrian ang Lebanese na suspek na si Nader Essam Assaf sa mga awtoridad ng Lebanon habang nanatili ang Syrian na misis niya sa kustodiya ng mga awtoridad sa Damascus.

Nito lang Pebrero nang ipagbawal ang pagpapadala sa mga bagong hire na overseas Filipino worker papuntang Kuwait sa gitna ng mga report ng pang-aabuso sa mga Pinoy HSW na kalauna'y lalong naging maigting na isyu nang matagpuan ang labi ni Demafelis.

Sa gitna naman ng umiiral na ban, hiniling ng ilang OFW sa Kuwait na huwag naman sanang pigilan maging ang pag-alis ng Pinoy skilled workers papuntang Kuwait.

• Hiling ng OFWs sa Kuwait: Newly hired skilled workers alisin na sa ban
• 300 Pinoy na pa-Kuwait, inapela ang deployment ban

Isa ang hustisya para kay Demafelis sa mga kondisyon ng Pilipinas bago ikonsidera ang partial lifting ng total deployment ban sa Kuwait.

• Ilang senador, pabor sa partial lifting ng deployment ban sa Kuwait

Noong Marso, sinabi ng DOLE na maaaring bawiin na ang deployment ban para sa skilled workers pero hindi ang para sa mga HSW.

Hinihintay pa ring magkapirmahan ang Pilipinas at Kuwait sa kasunduang mangangalaga sa kapakanan ng mga HSW.

• PH, Kuwait agree on draft deal for OFW protection
• Kasunduan para sa mga OFW sa Kuwait, binuo na

-- May bahaging isinalin mula sa ulat ng Agence France-Presse