2 opisyal ng POEA, dawit sa korupsiyon, illegal recruitment, sinibak

ABS-CBN News

Posted at Nov 21 2017 10:09 PM | Updated as of Nov 22 2017 12:49 AM

Watch more in iWantv or TFC.tv

Inalis sa puwesto ang dalawang opisyal ng Philippine Overseas Employment Administration (POEA) matapos masangkot sa umano’y korupsiyon at ilegal na paraan ng pagproseso sa overseas Filipino workers (OFW). 

Kasagsagan ngayon ng imbestigasyon sa korupsiyon at mga gawaing may kinalaman umano sa illegal recruitment sa POEA.

Ayon sa Department of Labor and Employment (DOLE), bukod sa balasahan, may dalawang opisyal na ang sinibak sa puwesto na hindi muna nila pinangalanan.

“Depende sa extent ng liability... makakasuhan ‘yon either administratively or criminally, and then hahantong talaga ‘yan sa removal from the service,” ani DOLE Undersecretary Dominador Say. 

Samantala, suspendido pa rin ngayon ang processing ng overseas employment certificate (OEC) dahil sa mga natanggap nilang report tungkol sa lumalalang problema sa illegal recruitment kaya walang bagong hire na OFW ang makaalis.

Napag-alaman kasi ng DOLE na may mga tauhan ng POEA na nakikipagsabwatan sa illegal recruiters at kumikita ng hanggang P250,000 sa pagpoproseso ng OEC kaya may mga bagong hire na nakakalusot bilang balik-manggagawa o returning OFW at nagre-renew na lang nito imbes na kumuha ng bago. 

Sa kabila ng suspensiyon, mahaba pa rin ang pila ng mga aplikante sa mga recruitment agency.

Tatanggalin din agad ang suspensiyon sa OEC processing pero nakasaad din sa DOLE order na puwede pang palawigin ang suspensiyon. 

Target na matapos lahat ng imbestigasyon sa December 1 para hindi na kailanganin ang extension ng suspensiyon sa pagproseso ng OEC.

Sa inisyal kasing tantiya ng POEA, 5,000 ang mga bagong OEC applications kada araw kaya inaasahang aabot sa 75,000 na bagong hire na OFW ang maapektuhan ng 15 araw na hindi pagpoproseso ng OEC na nagsimula noong Nobyembre 13.

-- Ulat ni Zen Hernandez, ABS-CBN News

Bisitahin ang Patrol.PH para sa iba pang mga balita.