Ipamamahagi ng Land Transportation Office (LTO) simula Martes, Agosto 29, ang driver's license card na mayroong five-year validity o limang taon ang bisa.

Sisimulan ang pamamahagi ng mga bagong lisensiya alas-8:30 ng umaga, sa LTO Central Office sa East Avenue, Quezon City.

Natapos na kasi ang pag-iimprenta ng mga lisensiya na gawa ngayon sa polycarbonate plastic.

May mas mahigpit na rin itong security features.

Ipamamahagi ang mga bagong lisensiya sa mga nag-apply o nag-renew ng kanilang mga driver's license mula October 17, 2016.

Nitong Agosto 2, nilagdaan ni Pangulong Rodrigo Duterte ang Republic Act No. 10930 na nagpapalawig sa bisa ng driver's license nang hanggang limang taon.

Pinirmahan niya rin ang R.A. No. 10928 na nagpapalawig sa bisa ng pasaporte hanggang 10 taon mula sa kasalukuyang limang taon.

• BASAHIN: Passport, driver's license, kapwa mas matagal na ang bisa

Pinag-aaralan na rin ng LTO na bumuo ng online application portal para sa mga driver na gustong mag-renew ng lisensiya at walang record ng paglabag sa anumang batas trapiko.-- Ulat ni Jeff Hernaez, ABS-CBN News