MANILA - Isa pang "person of interest" sa masaker sa San Jose Del Monte, Bulacan ang pinagbabaril ng mga hindi pa nakikilalang salarin Miyerkoles ng umaga.

Kinilala ang biktima na si Rosevelth Sorima, na unang nakapanayam ng ABS-CBN News at itinanggi ang kanyang koneksiyon sa pagpatay sa mag-iina.

Ayon kay Rosario, ina ng biktima, nagluluto ng tanghalian sa kanilang bahay sa Northridge Royale Subdivision sa San Jose del Monte nang pasukin sila ng 2 armado't nakamaskarang lalaki.

Giit ni Aling Rosario, walang kinalaman ang kanyang anak sa masaker at lagi siyang sumasama sa imbestigasyon ng pulisya kapag siya ay pinapatawag.

"Bakit naman po ginanoon ang anak ko na wala pong kasalanan? Palagi naman pong iniimbitahan ng mga pulis. Sabi nila wala naman daw nang problema 'yun," aniya.

Dagdag pa ng ina, agad itinakbo sa ospital ang kanyang anak pero sa balitang nakarating sa kanya ay binawian na ito ng buhay. Kinukumpirma na ng news team ang lagay ng biktima.

#TVPatrol Isa sa limang persons of interest sa masaker ng limang tao sa Bulacan, nangangamba sa kanyang kaligtasan | ulat ni @dolandcastro pic.twitter.com/UXpBPBmqZ4

— TV Patrol (@TVPatrol) July 4, 2017

Kahapon, natagpuan namang patay ang isa pang person of interest sa masaker na si alyas Inggo. Natagpuan itong walang t-shirt, napupuluputan ng pump belt ang leeg at may mga saksak.

Isang alyas Tony naman, isa ring person of interest, na dati nang lumutang sa pulisya ang hindi mahagilap ngayon, habang si Alvin Mabesa naman ay dinukot at hindi pa nakikita. Ulat ni Doland Castro, ABS-CBN News

• Duterte vows justice for Bulacan massacre victims