Watch more in iWantv or TFC.tv

MANILA -- Pinabulaanan ni Amy Perez ang kumakalat na isyung nagtatrabaho sa kanya ang taong diumano ay nakakita sa pagtawa ni Morissette sa video ni Sarah Geronimo, na naging emosyonal sa concert nito sa Las Vegas.

Sa "Umagang Kay Ganda" nitong Biyernes, nagsalita si Amy sa nasabing isyu.

"May umiingay kasing balita sa Twitter at medyo nag-aaway-away ang mga tao. Liliwanagin ko lang na wala akong PA, wala akong yaya [o make-up artist]. Wala rin po na sinasabi na diumano ay narinig na tumawa o kung anuman si Morissette dito sa set namin sa 'UKG,' wala pong nangyaring ganoon. Sinasabi ko na po, maliwanag po, wala pong nangyaring ganoon at hindi po totoo 'yung ilang mga bali-balitang kumakalat sa social media," paglilinaw ni Amy.

Sa huli ay nakiusap si Amy na huwag nang makipag-away kung hindi ay suportahan at mahalin na lang ang kani-kanilang idolo.

"Huwag na po tayong mag-away. Let's spread love and kindness. Mahalin natin si Sarah. Love natin si Sarah, love din natin si Morissette, love din natin si Angeline. So huwag tayong mag-away-away," pakiusap ni Amy.

Matatandaang maliban kay Morissette ay nadawit din ang mang-aawit na si Angeline Quinto na diumano ay nangutya sa nangyari kay Sarah.

Giit ni Angeline, malaki ang respeto niya kay Sarah at sa mga tagahanga nito.

Nakiusap din si Angeline na ilabas ng mga nag-aakusa ang video kung saan diumano ay pinagtawanan niya si Sarah.