Nagbabala ang Philippine Drug Enforcement Agency (PDEA) sa bagong modus ng mga drug dealer para makabenta ng droga sa mga kabataan.

Ayon sa PDEA, may impormasyon silang nakuha na nag-eenroll mismo ang mga drug courier sa mga eskuwelahan para makapagbenta deretso na sa mga estudyante.

"They have a point man na ipinakakalat sa mga colleges and universities. Itong point man nila, ang ginagawa sa isang university, naghahanap ng mga kliyente na mga estudyante," ani PDEA director general Aaron Aquino.

Nanggaling ang impormasyon nang tiktikan nila ang isang Nigerian national na si Dennis Thieke na tulak umano ng droga.

Naaresto noong Huwebes ang banyaga nang pasukin ang kaniyang condominium unit sa Mandaluyong City at nasamsam ang mga droga tulad ng shabu, marijuana, cocaine at ecstasy.