MAYNILA—Dalawang tama ng bala sa dibdib ang kumitil sa buhay ng isang construction worker sa Brgy. 176. Bagong Silang North, Caloocan, Lunes ng gabi.

Kinilala ng mga kaanak ang biktima na si Ricardo Perol, nakatira sa nasabing barangay.

Ayon kay alyas Anna, kasama ni Perol bago ang pamamaril, pumunta sila sa Phase 4 ng nasabing barangay para umano magtubos ng sinangla nilang relo.

Doon dumating ang dalawang salarin lulan ng isang motorsiklo at pinagbabaril ang biktima.

• Guwardiya patay sa pamamaril sa Antique

Aminado ang kapatid ng biktima na si Rodelyn Perol na lulong sa ilegal na droga ang biktima at nakulong na rin ito dati nang dahil dito.

Isa ito ngayon sa tinitingnang anggulo ng mga pulis.

Ayon naman kay Eladio Delos Santos, purok leader sa lugar, ito na ang pang-anim na beses na may naitala silang pamamaril sa kanilang lugar.

Kadalasan kasi aniyang dito nakikipagtransaksyon o palitan ng droga.—Ulat ni Lyza Aquino, ABS-CBN News