Pulis, pinatay ng riding in tandem sa Parañaque

Patay sa pamamaril ang isang pulis Martes ng gabi sa East Service Road, Barangay San Martin De Porres sa Parañaque City.

Kinilala ang biktima na si Police Cpl. Michael Banaag na binaril umano ng riding-in-tandem.

Ayon sa ilang nakakita, nakarinig sila umano ng magkakasunod na putok ng baril mula sa magkaangkas na suspek.

Dalawang linggo pa lang naka-assign sa Regional Mobile Force Battalion ng National Capital Region Police Office si Banaag.
 
Dati siyang anti-drug operative ng Manila Police District.

Ayon kay Police Col. Robin King Sarmiento, hepe ng Parañaque City Police, pauwi na sana sa Tondo ang biktima nang mangyari ang pamamaril.

Iniimbestigahan pa ang dahilan ng pagpatay.

--Ulat ni Lady Vicencio, ABS-CBN News