PatrolPH

Ilang pribadong ospital, problemado sa bilang ng mga nars

ABS-CBN News

Posted at May 20 2022 03:22 PM | Updated as of May 20 2022 04:29 PM

Watch more News on iWantTFC

MAYNILA (UPDATED) — Sinabi ng Private Hospitals Association of the Philippines ngayong Biyernes na problemado ang ilang miyembro nito dahil sa dami ng nars na umaalis para magtrabaho sa ibang bansa o sa mga pampublikong pasilidad. 

“'Yan po ang isang napakalaking problema ng private hospitals, kasi talagang, tuloy-tuloy po ang pag-alis ng ating mga nurses, nagpupunta po sila sa abroad, lumilipat sa government facilities,” ani PHAPI president Dr. Jose Rene de Grano. 

Aniya, lalala ang naturang problema kung sisirit ang mga kaso ng COVID-19 sa bansa.

“Sana po ay maintindihan po ng ating Department of Labor [and Employment] na siguro tama lang po na limitahan muna nila 'yung paglabas ng ating mga nurses,” sabi ni De Grano. 

Noong Pebrero, itinaas ng gobyerno sa 7,000 ang deployment cap para sa mga Pilipinong health-care na nais mangibang-bansa. 

Pero sinabi ni Department of Migrant Workers Secretary Abdullah Mama-o nitong Abril na nais niyang pag-aralan ang numerong ito.

Sinisikap nang tapatan ng ilang pribadong ospital ang sahod na ibinibigay ng gobyerno, sabi ni De Grano. 

Aniya, “Yun pong binibigay ng government na around P33,000 to P33,000 plus, 'yun po’y pinapantayan na, sinisikap pantayan ng ating mga pribadong ospital.”

“But siyempre yun pong mga maliliit pong pribadong hospital… hindi naman na po kakayanin yon dahil kami po’y, doon din kami nakasalalay 'yung aming pagbibigay ng ganoon sa mga pasyente po,” dagdag niya. 

Watch more News on iWantTFC

EXODUS

Inaasahan din ng Philippine General Hospital na maraming aalis sa kanilang "skilled" healthcare workers dahil sa pagbukas ng ibang bansa.

"Medyo 'yan nga po ang medyo malungkot dahil nag-open po ang maraming bansa para sa mga [healthcare] worker," ani PGH spokesperson Dr. Jonas del Rosario sa panayam sa TeleRadyo Biyernes.

"Madami po kaming nakikitang mga resignation ngayon at ‘yung mga iba po, mga skilled po talaga sila. Matagal na pong operating room nurses, 'yung mga nasa ICU po."

Ayon kay Del Rosario, nananawagan ang PGH sa mga bagong nars na mag-apply.

"Marami po kaming bakante ngayon. Hindi lang sa ICU or operating room, pati po sa mga ward," aniya. "They’re actively recruiting para habang medyo may kaunting katahimikan ay madagdagan po bago dumating, kung sakali lang, magkaroon ulit ng surge."

Ang PGH ang pinakamalaking COVID-19 referral center sa bansa. — TeleRadyo, 20 May 2022
 

Bisitahin ang Patrol.PH para sa iba pang mga balita.