Isang hindi pa kilalang lalaki ang binaril sa mukha ng isa umanong notorious killer sa Abante Compound, Port Area, Manila, madaling araw ng Biyernes.

Isang tama ng baril sa mukha ang ikinamatay ng biktima.

Ayon sa mga tanod ng barangay, walang pagkakakilanlan ang biktima dahil hindi ito taga-roon.

Samantala, isang testigo umano ang lumapit at itinurong bumaril ang nagngangalang si Singkitty Musa na isa umanong notoryus na pumapatay sa Port Area at sa Baseco pero hindi nahuhuli dahil takot ang mga kaanak ng biktima na magsampa ng reklamo.

Ayon kay PCP Baseco Compound, Manila S/Insp. Randy Veran, tinutugis na ang suspek na kilala ring tulak ng droga bukod sa pagpatay.

''Nahuli siya noong nakaraang taon sa drugs ng Station 5 pero nakapagpiyansa,'' ani Veran.

Dinala na sa punerarya ang mga labi ng biktima na naka-asul na sando at itim na shorts, at nasa 19-23 anyos.

April Rafales, ABS-CBN News