PatrolPH

Turistang Indian national nalunod sa Zambales

Reiniel Pawid, ABS-CBN News

Posted at Apr 18 2022 06:59 AM

Watch more News on iWantTFC

Nabalot ng lungkot ang masaya sanang outing ng isang pamilya nitong Holy Friday matapos malunod ang isa nilang kasama sa beach resort sa San Narciso, Zambales.

Kinilala ang biktima na si Pramod Passi, 52 taong gulang, isang Indian national at kasalukuyang naninirahan sa Marikina City.

Nag Holy Week outing umano si Passi kasama ang kanyang mga kapamilya at kaibigan sa Crystal Beach Resort.

Ayon sa report ng pulisya, dakong alas-1:15 ng hapon ay naligo raw sa dagat si Passi kasama ang kaibigang si Parveen Singh.

Matapos ang ilang sandali ay iwinawagayway na raw ni Passi ang kanyang kamay at humihingi ng saklolo sa pagkalunod.

Agad namang rumesponde ang lifeguard subalit matapos ang 15 minuto saka pa lamang Nakita ang katawan ng biktima.

Itinakbo pa si Passi sa pagamutan ngunit binawian na rin ng buhay.

Ayon naman sa official statement ng resort, nakikiramay ito sa pamilya ng nalunod na Indian national.

Muli rin nilang pinaalala na kumpleto sila sa lifeguard at signages kung saan lamang maaring mag-swimming ang mga turista.

ABS-CBN News, April 18, 2022

Bisitahin ang Patrol.PH para sa iba pang mga balita.